C´erà una volta....Es war einmal...
Erstamoi a freundliches "Ciao" (Anm.: "Ciao" heisst auf italienisch "griasdi" UND "pfirti" an olle di des lesen und anscheinend a Interesse zoang an meim Tagebuch.

Am besten is glaub i, wenn i mi amoi kurz beschreib...

Oiso i bin de Carmen, bi 19 Joahr und in Linz in Österreich geboren. Jo i bin a kloana Schwärmer fia Italien...najo eigentlich scho a bissi oa Freak, wos Italien betrifft, weil i lieb afoch des Laund, de Leut, de Laundschoft, de offene Lebensweise, de Kunst, de Kultur, de generelle Einstellung zum Leben von de Italiener und afoch kurz und bündig OLLES ^^

I kauns a ned erklären wiso und warum, oba aungfaungen hods sicha damit, dass i scho ois kloas Kind imma wenns gonga is, in Italien wor.

Zerst wor de Begeisterung jo afoch nur weis just des beste Eis, de geilsten Spüsochen und de spendabelsten Eltern do gem hod^^, daun in da Schui wor "Italien foan" imma a Zeichen fia - es is schuifrei, später daun woa i oiwei berauscht vom shoppen geh (des is ma a bliem glab i) und de gaunzen Beachboys à la "Baywatch" (i glaub des a^^) und jo im Zuge des Erwachsensein/werdens hob i mi daun hoid a afoch amoi mit da Kultur und da Geschichte von Italien beschäftigt (-und i bin bei Gott ka Fan von Geschichte gwen) und des hod mi a fasziniert. Jo und so hod sie des eben ergeben, dass mei Wunsch/Traum und Ziel wor, irgendwann, wenn i fertig mit Ausbildung, Führerschein etc bin, in Italien leben zu wollen...

Weil mittlerweile sans afoch de kloanen Dinge, de mi afoch voi happy mochen, per esempio, wenn ma am nassen Sand beim Meer entlang geht und ma schaut am Boden und siagt sein Fussabdruck, bis de nächste Welle gaunz leicht oba kalt über de Zehn schwappt und de Spur afoch mitnimmt. Automatisch schaut ma daun aufs Meer raus und siagt do eigentlich erst, wie unendlich am des Meer vorkommt, und dann hod ma vielleicht noch des Glück dass ma an Sonnenuntergang siagt, des is a so genial, do geht die Sonne zerst gaaaaaunz laungsaum imma nur a Stückal owa, man glaubt owa se bewegt sich goa ned, daun vo da oan auf de aundare Sekunde wird da Himmel und des Meer grellorange-rot und in de nächsten boa Sekunden verschwindet de Sonne irrsinnig schnö "unterm" Meer...

Oda wennst im Bett liegst, ausm Fenster schaust, de Sterne siagst und afoch nur de Geräusche zuaherst, des is jo a so schei, do herst de leise Musik aus de Cafès und Autos, de innerhoib von 6 Meter drei moi hupen, daun is wieder mal still und daun herst wieder a Gruppe von Menschen (Anm: de Italiener gengan glaub i imma nur in Gruppen wohin^^) reden...und daun wochst am nächstn Tag auf, herst glei mal de Vögel ois erstes und wennst daun ausm Fenster schaust, siagst richtig wie "Italien aufsteht". De gaunzen Leid mochn olle ernare Gschäfter, Bars, Caffès, Paninotecen,...betriebsfertig, heisst putzen alle Tische, schoiten de Maschinen fia Granita und Caffè ein, fegen vor ernan Eingangsbereich...und des san afoch unbezahlbare kleine Dinge, über de i voi glücklich bin, wenn i des her und siag....

Und hiazat, i kauns goa ned glauben, erfüllt se des gaunze grod, indem dass i am 29.5.09 auf Saison noch Italien geh fia a hoibs Joahr.

Und es is afoch so a megageil unbeschreibliches Feeling zu wissen, dass ma wos erreicht hod, wos eigentlich imma, in jeder Minuten wo ma wos dau hod, des Ziel wor...vor allem wenn mas selber gschofft hod.

Wenn ma des früher wer gsogt hätt, dass des hiazat so schnö geht oder wenn früher de Leid imma gsogt hom "wennst wos wirklich wüsst, daun schoffst das a", hätt i ma nur docht "jojo is kennts e reden"...

Jep und weil des hoid trotzdem irgendwie a komplett neicha Lebensobschnitt is, egal obs jetzt negativ wird (wos i e ned glaub) oder positiv, es san sicha tolle neue Erfohrungen und Einflüsse fias Leben - und deshalb mecht i des irgendwie festhoidn, des is der Grund, warum i do hiaz des Tagebuch aufaung^^

hmm i glaub fian ersten Eintrog reichts hiaz e erst amoi...

♥♥ noch 26 Tage - solo 26 giorni ♥♥